都市日報
 即時新聞
  Metro 28
娛樂
草蜢 一世情
返回
人生得一知己死而無憾,做朋友做到可以無分你我,問世間又有幾多個?對識於微時的蘇志威和蔡一智及蔡一傑兩兄弟來說,他們3個大大話話都已認識了半個世紀。到底這3個曾共同進退的好兄弟,他們的感情、默契是如何建立起來的呢? 撰文:葉文健

內文節錄自now香港台節目《Home Sweet Home》

 

 


鄭丹瑞:鄭 蔡一智:智 蔡一傑:傑 蘇志威:威

 

鄭:有無數過你哋識了多少年?

智:我識了蘇志威44年。

 

鄭:識了40幾年,日久⋯唔心煩的嗎?

威:煩㗎,無辦法,有些事孭了上身,擺脫唔到。哈⋯⋯

 

鄭:細個住喺邊?你哋是怎樣認識的?

威:嗰時住喺觀塘鯉魚門道新邨。

智:係啊,還要得7座,所以邨民很容易便會聚在一起。加上我們和蘇志威住得很近,走廊玩完就到波地玩,之後小學又讀埋同一班。

威:(立即澄清) 我冇跳班㗎!(鄭:但蔡一智有留班啊?)哈⋯⋯哈⋯⋯我無講㗎!

智:到了中學,蘇志威和蔡一傑的學校很近,到中學畢業出嚟工作,我又和蘇志威做同事。

 

鄭:真係好有緣啊!咁你哋細細個便已經開始一起玩大㗎啦?

威:細個阿媽唔畀我出波地玩的,但因小學已和蔡一智同班,所以關係幾close。

智:中學就開始多活動啦,常3個人一起打波、露營。

鄭:知道你哋很細個就認識,但點樣先做到老友?

威:最初係蔡一智和我阿哥玩埋先,我那時住6樓,有年中秋節,佢從樓下叫上來找我阿哥出去玩,我阿哥又唔得閒,我就好無聊咁應了他,便和他去了去維園傾咗一整晚。

 

鄭:因為這件事,所以建立起友誼來吧!當時幾多歲呢?

智:都係11、12歲左右啦。

 

鄭:你哋一起長大,相處咗咁耐,覺得邊個最貪靚?

威:佢哋兩個都好貪靚,草蜢剛開始的頭10多年,就肯定是蔡一傑,但近幾年,就連蔡一智都貪靚起來。

傑:我認為自己係貪靚啲,但蔡一智就係貪貪靚!

智:蔡一傑就一直都貪靚的,至於我,人生經歷了那麼多,只是將一些標準的東西放到自己的身上。

 

鄭:3個當中,邊個最多意見?

智:(威和傑立即指着智) 我認,因3個之中,只有在下會讀吓書,表達能力較好。

傑:我就較多鬼主意,想好了便會和他們講,蘇志威通常都只會沉思,蔡一智聽後便會為大家作出分析,到最後,蘇志威便會拍板通過。

威:其實點解我唔出聲呢,因聽他們兩個講已經好頭痛,如我又加把聲,幫我哋做嘢啲人會點做嘢呢?(傑:你無意見就無意見啦⋯⋯哈⋯⋯)

 

鄭:你哋3個入面,梅姐最錫邊個?

威、智:好似係蔡一傑。

傑:但我又唔係好識?人㗎喎。

智:其實正常嚟講係無分的,3個都好平均。

 

鄭:林珊珊,你哋個經理人,會覺得邊個最煩?

威:我知一定唔係我。

傑:我估珊珊會覺得我們3個都煩吧!

 

鄭:又唔係喎,佢同我講,覺得你哋都幾易照顧。

傑:點解大家可以相處20幾年呢,或者係大家的思想比較近,有嗰句講嗰句,比較夾。

 

 

 

 

後記

人與人之間的相處,從來都是一門艱深的學問, 草蜢3子,相知相識40載,曾共富貴、共患難。今日,他們有的雖已成為別人的丈夫,小孩的父親,但赤子之心仍是不變。嚟緊4月,3兄弟將再次走在一起舉行《草蜢忘我演唱會》,誓言要以熱情的歌曲、強勁的舞步,為充滿壓力的都市人打打氣!


 

本周六晚10時,now香港台首播。

 








Copyright 2014 by Metro Publishing HK Ltd.
私隱政策  |   免責聲明  |   桌面版