都市日報
 即時新聞
  Metro 28
專欄作家
東尼##本地球壇##畢特下周一抵港 天光隊索夫孭重飛
返回

「少林寺」噚日正式公布,畢特會喺下周一晏晝兩點左右到港,四點半開記招,六點喺掃垾埔操練,翌日孭起「袈裟」戰「飛馬」。



上屆淪為護級隊伍,今屆又走咗多名主力,順勢將隊波「年輕化」,但又話要爭錦標嘅「天光隊」,今季表現差強人意,聯賽6戰失16球得4分排尾三,周六對同分嘅「地區豚」,係名副其實嘅「護級大戰」!「天光隊」今非昔比,呢場波仲要作客「地獄球場」,要結束三連敗一啲都唔易。


東尼最近發現,上仗對「市民隊」失咗正選位嘅前南華門將張建忠唔見咗,打聽之下,原來佢同會方達成解約協議,所以呢位「假局長」已返番大陸,咁嚟緊對「地區豚」前「馬交」門神「索夫」(圖)就要孭重飛!不過,「索夫」係「馬交」公務員,平日唔可以嚟香港跟隊操波,所以佢寧願喺「天光隊」做二號門神。家吓被委以重任,一場、半場就話可以頂吓,長遠就會有好大問題!其次係隊中青年門將「驊弟」係咪依然有得操冇得踢?呢啲關係到球隊管治同士氣問題。


 


東尼




Copyright 2014 by Metro Publishing HK Ltd.
私隱政策  |   免責聲明  |   桌面版