都市日報
 即時新聞
  Metro 28
港聞
FACE博
返回

支那STYLE擺明歧視

最近有網民惡搞,將最熱爆嘅韓國歌曲GAMNAM STYLE改詞,配合紅軍歌畫面,寫成「核突支那STYLE」。

首歌諷刺內地人喺香港嘅唔禮貌行為,仲用唔鹹唔淡嘅廣東話唱「喺港鐵入面急起上嚟就……」,又以「一身金飾,xx鑲金,鑽石9卡」,來形容身光頸靚嘅內地人,但又唔願排隊等位,盡顯暴發戶性格。

雖然歌詞頂癮搞笑,但內容都涉及唔少歧視色彩,好似以「蝗蟲」、「支那」嚟形容中國人,引來網民罵戰。

因為支那係日本侵華時稱呼「CHINA」嘅音譯,當時日軍叫中國人做支那豬,所以有網民認為,雖然有一部分內地人冇禮貌,但都唔需要用支那呢啲字眼,香港人都係中國人等等。

但支持首歌嘅網民,就唔覺得有問題,仲叫用簡體字回應嘅內地網民「滾番大陸」,內地網民亦回敬一句「港狗」,可見網絡上嘅中港矛盾,日漸嚴重。




惡搞陳鑑林︰捉我吖,笨!

自從出現唐唐嘅地下皇宮後,政界人物嘅僭建問題經常成為記者追訪嘅事,以為佢哋會醒醒定定拆走啲僭建啦!點知,負責監察政府僭建政策嘅立法會發展事務委員會成員陳鑑林,竟然唔肯拆走屋頂間天台屋同花槽。

陳鑑林喺沙田嘅丁屋僭建物,屋宇署上年8月已向佢發出清拆令,要求喺30日內拆走,但陳鑑林遲遲未拆,終於喺上年10月畀房署「釘契」。之後佢仲好醒咁,喺4個月前主動向屋宇署申報有僭建物,希望證明冇即時危險,換多5年限期唔使拆。有傳媒叫佢回應時又話,「全世界都好多僭建」、「媒體有心整我」。唉,真係死不悔改。有網民睇唔過眼,就改圖惡搞話「捉我丫,笨!」網友仲好體貼咁幫ICAC話︰「你班友,畀我唞下得唔得!」


超人打獸 顧住啲樓

最近喺Youtube出現咗一條「超人打怪獸」嘅片,聽落好似好老土,應該又係被選中嘅超人變大打怪獸,為人民服務啫。但呢條《超人壹號》片就出乎意料啦!入面嘅超人先唔係「被選中」,而只係打工仔一名,為咗生活不惜當上危險嘅超人。去到打怪獸時,佢竟然為咗保護啲「重要樓宇」同怪獸大跳社交舞。

條片重要笑盡依家新樓嘅奇怪改名,乜都同皇帝有關,咩「君臨x下」、「君要臣死」。最無厘頭嘅,係喺個名度加上唔知做咩嘅標點,「御.x門」,話呢樣就唔打得。咁喺樣樣都唔打得嘅情況下,超人只好引獸入舊區做戰場,同怪獸大戰三百回合。最後怪獸就消滅咗,但成個舊區就化咗灰。當以為成件事又係好老土咁完結嘅時候,原來另有內情,原來超人都係為地產商服務,打爛啲舊區。成條片搞笑抵死,打工仔睇到笑中有淚。http://www.youtube.com/watch?v=DSYK18l9ilQ


 


偉霆司機

 









Copyright 2014 by Metro Publishing HK Ltd.
私隱政策  |   免責聲明  |   桌面版