都市日報
 即時新聞
  Metro 28
娛樂
闖進《毛記電視》總壇 東方昇追擊齊昕 大呼過癮
返回

近月擺明車馬將電視節目二次創作的網絡電視台《毛記電視》人氣爆燈,內容離不開以惡搞及抽水形式來諷刺時弊,開台短短5個月,facebook已吸納7萬多個Like,更令一班男、女主播在網上爆紅。

當中6位最吸Like的主播,以「偽名」東方昇、黃慘盈、盤菜瑩子、專家Dickson、利君牙和崔建芒示人,早前《e+娛樂》全港首次殺入《毛記電視》總壇,追訪眾人,原來東方昇一講女友即面紅,盤菜瑩子真人仲索,專家Dickson堅係一個「溝唔到女嘅可憐蟲」!


「東方昇」臨場執生


《毛記電視》一星期有五日都見街的節目《六點半左右新聞報道》,幕後功臣正是主播「東方昇」。原名王嘉偉的他,讀書時已在俞琤旗下的天比高做實習生,其後加入商台做創作。在天比高時認識《100毛》創辦人之一的林日曦,獲對方邀請加入《毛記電視》,短短幾個月,其頭破血流的「東方昇」形象已有回響並深入網民心。

談及創作主播的形象,東方昇指最過癮是考即時反應,說到最過癮一次的臨場執生,他二話不說︰「嗰次書展追擊齊昕(特首梁振英女兒梁齊昕),冇諗過佢會嚟,嗰刻發現佢真係嚟,見佢畀人圍住,即刻諗扮保安。當時得我咁高調去追擊佢,齊昕仲問我︰『點解你包住個頭?』」

今年29歲的王嘉偉,形容自己是個怪人,問他有沒有女朋友?原本說話踏實有自信的「東方昇」,忽然變得口窒窒,問一句答一句︰「都有嘅。(拍咗幾耐?)都年幾。(點識?)以前同事。(會諗結婚嗎?)都會,但冇咁快。」


東方昇

真名:王嘉偉

特徵:貌似錢小豪,成日戴住血染的頭巾,歌頌祖國

咩年紀:29歲

興趣:鍾意去垃圾房執木材造木椅

讀過乜︰公開進修大學修讀心理學,自修廣告設計

有冇拍拖:有個好就得佢嘅女朋友

fb呃Like指數:23,252


「專家Dickson」失戀22次


經常以愛情投資專家、愛情軍事學家以及愛情證券市場分析員自居的「專家Dickson」,原名叫阿泰,曾經教過書,做過馬經版編輯,現職《100毛》編輯。今年30歲的他,說到愛情經驗,好真心咁話︰「有追過女仔,但係冇成功過,所以未拍過拖。」

阿泰身形瘦削且有點寒背,談及自己的外形,他一臉認真的剖析,「以前教書入到班房,啲女同學就笑,我好認真咁講書,棚牙凸出嚟,佢哋就笑得特別勁,我就發覺自己有搞笑天分,唔出聲都好好笑。」

對愛情仍充滿憧憬的他,好有阿Q精神,「我嘅戰績係22戰22負,每次都有唔同死法,做愛情專家都係引用《孫子兵法》,或者更簡單嘅方法,就係將我失敗經驗掉番轉就成功。」

演繹「專家Dickson」時,總是有一堆紙巾放在電腦旁,不禁令人有所聯想?他就說︰「人人都要用廁紙,我只係呻鼻涕啫。」問他有生理需要時,又如何解決?他好認真話︰「一般男人嘅方法,對住咁多人我講唔出口。」


專家Dickson

真名:阿泰

特徵:樣子很「毒」但出口成文,有一棚哨牙。

咩年紀:30歲

興趣:獨自欣賞蒼井空作品

讀過乜︰嶺南大學中文系

有冇拍拖:自稱有女朋友Mary(其實係假人頭)

fb呃Like指數:11,668


愛吃麥記的「黃慘盈」


原名Jessica的「黃慘盈」,大學畢業後做了一年空姐,去年參與HKTV(港視)的大型招聘活動,但簽約前夕,HKTV卻不獲發免費牌照,後來獲朋友介紹拍麥當勞廣告,輾轉加入《100毛》擔任Fashion版編輯,最後做埋主播。在《毛記》辦公室內,Jessica跟「專家 Dickson」坐埋一齊,問她會否介紹女仔給對方,她語帶投訴的說︰「佢唔係正常人,凡人高攀唔到佢,因為佢係神。我有時行過,佢成日都叫我行開,嫌棄我。」

已經名花有主的Jessica,大讚梁祖堯是男神,「佢演嘅劇我都睇晒,其實『東方昇』都係我男神,佢好有才華,我都驚我忍唔住愛上佢。」好坦白喎!


黃慘盈

真名:Jessica

特徵:每次報新聞至少喊一鑊

咩年紀:23歲

興趣:鍾意一個人食麥記

讀過乜︰浸會大學傳理學院新聞系

有冇拖拍:有男友

fb呃Like指數:8,739


最呃Like「盤菜瑩子」


《毛記》眾女主播中,「盤菜瑩子」是最受網民歡迎,還說得一口流利的日文,原來她讀大專時已修讀日文,曾經在日本工作過。為保持她的神秘形象,「盤菜」沒有透露她的個人資料。

「盤菜」被高登仔稱為最靚的女仔,為此她說:「我覺得自己唔係好靚,咁女仔多數都貪靚,只係網友講得誇張。」她從來沒有想過去選美,或者去做模特兒。愛好日本文化的她,在07年曾與志同道合的友人組動漫band AniZ,她以Cosplay造型唱日文歌, 「解散咗兩、三年,依家都想組番隊,但係又冇咁多時間整衫整道具。」


盤菜瑩子

真名:佢唔肯講

特徵:有兩個引死高登仔的小酒渦

咩年紀:目測20幾歲

興趣:組Band玩Cosplay

讀過乜︰大專,攻讀日文

有冇拍拖:唔話你知

fb呃Like指數:30,647


翻版薛凱琪「利君牙」


成日依起棚牙的「利君牙」,忽然消失《毛記電視》,最近她終於回歸,原名叫Mavis的她,親自解答被「雪藏」一事,「之前唔見咗我,係因為我去咗德國做實習兩個月。」原來她在《毛記》的身份只是Part Time,「之前我有幫手《100毛》嘅年宵攤檔,後來《毛記電視》開台,佢哋叫我嚟幫手,做主播覺得幾好玩,亦好啱我,因為我好有表演慾,細個好想讀演藝學院,但係唔收我囉!」

參加過Neway歌唱比賽的Mavis,唱歌時被形容似薛凱琪。她最欣賞有才華的男神,好似Eason(陳奕迅)、Juno(麥浚龍)和盛智文,好明顯唔鍾意靚仔囉!


利君牙

真名:Mavis

咩年紀:23歲

興趣:扮薛凱琪唱歌

讀過乜︰浸會大學傳理學院公關及廣告

做過邊行︰去德國做實習生

有冇拍拖:有

fb呃Like指數:11,203


戇直主播「崔建芒」


外形不算高大,沒有騎呢行徑,一臉戇直青年模樣的「崔建芒」,原名叫阿豪,在《毛記電視》當編輯,在開台前一個月加入,負責音樂節目《勁曲金曲》。將歌曲二次創作改歌詞,是否他一人包辦?他說:「唔係,大家集思廣益。」早前他在何韻詩的個人音樂會中,首次當上大騷司儀,更有機會與何韻詩在後台合唱一曲《明張目膽》,「恨咗好耐,迫到佢同我合唱,企喺佢身邊梗係冇得比。」作為主持「崔建芒」,他坦言都想跟崔建邦見過面。在眾男主播中,他的吸Like程度不及其他人,他自知的說:「係呀!冇咁多人關注我,我本身都唔係好鍾意咁高調。」


崔建芒

真名:Kyle

咩年紀:廿到尾

興趣:扮聲唱歌

讀過乜︰倫敦密德薩斯大學媒體及文化研究(榮譽)文學士

做過邊行︰廣告

有冇拍拖:冇,但又冇女神,應該唔係hehe

fb呃Like指數:3,237






講女友面紅 東方昇談起女朋友時,一度面紅,坦言暫時未有結婚打算。


追訪梁齊昕 今年書展,東方昇突擊報道梁齊昕(右)。


一生最chok 專家Dickson擺出他人生以來最Chok的甫士。


同女友打車輪 專家Dickson介紹他從雜物櫃認識的「女朋友」Mary,更即時示範咀Mary,但他說東方昇曾經咀過「女朋友」,內心好唔舒服。


黃慘盈的招牌喊樣。


做過空姐 黃慘盈曾在國泰航空做過空姐,一年咁多。


盤菜瑩子天生的甜美酒窩,令網民留下深刻印象。


Cosplay夠Cute 她喜歡唱歌之外,有時會玩Cosplay,好可愛囉。


靚牙似Fiona 利君牙一排靚牙,成為她的招牌Icon,笑起來的確有點像薛凱琪。




崔建芒比較沉默,愛唱歌和二次創作歌詞。


與何韻詩合唱 崔建芒在早前何韻詩音樂會中擔任司儀,在後台跟阿詩合唱一曲。

Copyright 2014 by Metro Publishing HK Ltd.
私隱政策  |   免責聲明  |   桌面版