都市日報
 即時新聞
  Metro 28
港聞
NEWS力場 廣東話虛詞好玩 你又識幾多?
返回

好多人都話廣東話比起其他語言難學,香港人講開廣東話,就當然唔覺啦!不過,小記聽完中大榮休講座教授張洪年同中文系主任鄧思穎嘅講座後,就發現廣東話認真唔易學㗎!


原來粵語有成40個虛詞,仲要個個虛詞搭配嘅意思都唔同添! 用食飯做例,可以有食咗、食定 、食過、 食開 、食住、 食埋、食親、食得、食晒……飯。嘩!唔講唔覺,一講就覺得好勁呀!咁多字詞配搭都記到!未夠喉?教授講得開心,仲即場示範添!


句末都有好多玩法㗎!食飯先、嚟、啦、未、咋、囉、啫、啩、咩、啦喎、好過……仲多選擇過自助餐呀!


有啲字你用唔同聲調去講,又會有唔同嘅意思,好似個「喎」字咁,可以讀「禾」、「禍」,帶出嘅感情都有唔同㗎!不過,鄧主任話唔係個個字都得!好似個「咩」字,就真係得一個讀音啦!


粵語真係博大精深,唔怪之得兩位教授咁落力研究啦!不過,就可能難為咗啲外地嚟嘅交換生,佢哋嚟到香港要聽咁複雜嘅廣東話。不過,學多一種語言都唔係壞事嘅!希望香港人都可以為我哋所講嘅語言驕傲啦!


 




▲中大搞講座介紹粵語文化。(李雪華攝)


▲兩位教授的著作眾多。(李雪華攝)

Copyright 2014 by Metro Publishing HK Ltd.
私隱政策  |   免責聲明  |   桌面版